Almería – sólrík perla Andalúsíu

Almería er eitt af best geymdu leyndarmálum Andalúsíu á suðausturströnd Spánar. Svæðið er þekkt fyrir einstaklega gott veður, fallegar strendur, afslappað andrúmsloft og ekta spænska menningu. Hér sameinast strandfrí, menning, góður matur og fjölbreytt afþreying á hagstæðu verði, sem gerir Almería að frábærum áfangastað fyrir bæði fjölskyldur, pör og vinahópa.

Heillandi borg með ríka sögu

Borgin Almería á sér yfir þúsund ára sögu og er eitt af áhugaverðustu menningarsvæðum Andalúsíu. Yfir borginni gnæfir hið glæsilega Alcazaba-virki, eitt stærsta virki Spánar frá tímum Máranna. Frá virkinu er stórkostlegt útsýni yfir borgina, höfnina og Miðjarðarhafið.

Í miðbænum má finna notaleg torg, göngugötur, verslanir og veitingastaði þar sem heimamenn og gestir njóta lífsins fram á kvöld. Borgin hefur varðveitt sinn spænska sjarma og þar ríkir afslappað andrúmsloft sem margir ferðalangar kunna vel að meta.

Frábærar strendur og fjölskylduvæn stemning

Almería-svæðið er þekkt fyrir langar sandstrendur og yfir 300 sólardaga á ári. Strendurnar eru hreinar og fjölskylduvænar og henta jafnt þeim sem vilja slaka á í sólinni og þeim sem kjósa virkara strandlíf.

Hótelin okkar eru staðsett í strandbænum Roquetas de Mar, sem er aðeins um hálftíma akstur frá flugvellinum í Almería. Þar er að finna fallega strandlengju, líflega göngupromenade, smábátahöfn og fjölbreytt úrval af afþreyingu fyrir alla aldurshópa.

Matur og ekta tapas-menning

Andalúsía er þekkt fyrir matarmenningu sína og Almería er engin undantekning. Borgin og nærliggjandi bæir eru sérstaklega þekktir fyrir tapas, ferskt sjávarfang og hefðbundna spænska rétti. Á mörgum stöðum fylgir tapas-réttur með drykkjum, sem gerir kvöldrölt um bæinn að einstakri upplifun.

Það er fátt notalegra en að setjast niður á útikaffihúsi eða tapasbar, njóta góðs matar og fylgjast með mannlífinu á torgunum þegar kvöldsólin gyllir göturnar.

Verslun og afþreying

Í Roquetas de Mar og Almería er gott úrval verslana, allt frá litlum sérverslunum til stórra verslunarmiðstöðva. Gran Plaza-verslunarmiðstöðin er ein sú stærsta á svæðinu og þar má finna vinsælar spænskar verslanir á borð við Primark, Pull&Bear, Stradivarius, Bershka, Lefties og Massimo Dutti, auk alþjóðlegra vörumerkja.

Fyrir þá sem vilja meira en sól og strönd er af nægu að taka. Á svæðinu eru vatnagarðar, sædýrasafn, go-kart brautir, hjólaleigur og fjölbreyttir markaðir. Fjölskyldur njóta sérstaklega skemmtigarðsins Oasis Mini Hollywood sem byggður er á gömlum kvikmyndasettum þar sem fjölmargar vestramyndir voru teknar upp.

Fallegt umhverfi og spennandi dagsferðir

Náttúran í kringum Almería er einstök og fjölbreytt. Þar má finna eyðimerkur, fjalllendi, fallegar víkur og óspilltar strendur. Cabo de Gata-þjóðgarðurinn er ein af náttúruperlum Spánar og vinsæll meðal þeirra sem vilja upplifa ósnortna náttúru og kristaltært haf.

Einnig er vinsælt að fara í dagsferð til Granada, einnar fallegustu borgar Spánar. Þar er hin heimsfræga Alhambra-höll, sem er á heimsminjaskrá UNESCO, auk sögulegra hverfa og einstakrar byggingarlistar sem endurspeglar áhrif Máranna á svæðið.

Frí fyrir alla

Almería býður upp á fjölbreytt úrval gistimöguleika, allt frá notalegum íbúðahótelum til glæsilegra strandhótela með allt innifalið. Hvort sem markmiðið er afslöppun við sjóinn, fjölskyldufrí með mikilli afþreyingu eða að upplifa ekta spænska menningu, þá er Almería áfangastaður sem kemur skemmtilega á óvart.