Gardavatn – ítölsk fegurð, fjöll og rómantískir bæir

Gardavatn er einn fallegasti og vinsælasti áfangastaður Norður-Ítalíu og staður sem margir vilja heimsækja aftur og aftur. Umhverfið einkennist af tignarlegum fjöllum, litlum sjarmerandi bæjum, ólífulundum og tærbláu vatni sem skapar einstaka stemningu allt árið um kring.

Allir eiga sinn uppáhaldsbæ við vatnið og auðvelt er að uppgötva nýja og spennandi staði í hverri ferð. Svæðið hentar sérstaklega vel þeim sem vilja ferðast um á bílaleigubíl og njóta frelsisins til að skoða fallega bæi, vínhéruð og náttúrufegurð á eigin hraða.

Náttúrufegurð og einstök staðsetning

Gardavatn liggur í skjóli Alpanna í norðri en í suðri tekur Pósléttan við. Vatnið er það stærsta á Ítalíu og nær yfir þrjú héruð; Veneto, Lombardia og Trentino-Alto Adige.

Svæðið er þekkt fyrir stórbrotna náttúru, há fjöll sem umlykja vatnið og falleg vínræktarsvæði á borð við Valpolicella-dalinn. Umhverfis vatnið má finna fjölbreyttan gróður og er þetta nyrsta ólífu- og vínræktarsvæði Evrópu.

Það er erfitt að verða ekki heillaður af fegurð Gardavatnsins, litlu hafnarbæjunum, gönguleiðunum meðfram vatninu og rómantískri stemningunni sem einkennir svæðið.

Afþreying og útivist

Við Gardavatn er mikið úrval af afþreyingu fyrir alla aldurshópa. Þar má meðal annars finna fjölskyldu- og skemmtigarðinn Gardaland sem er einn vinsælasti skemmtigarður Ítalíu.

Svæðið býður einnig upp á fjölbreytta útivist á borð við siglingar, hjólreiðar, gönguferðir og ýmiss konar vatnaíþróttir. Stutt er á milli bæja og því auðvelt að ferðast á milli þeirra með bíl, báti eða hjóli.

Samgöngur og aðgengi

Enginn fararstjóri verður á staðnum né rútuferðir í boði frá Úrval Útsýn.

Frá Verona-flugvelli er hægt að taka flugvallarrútu að lestarstöð og þaðan lest til Peschiera del Garda. Þar er auðvelt að taka rútu áfram að bæjum við Gardavatn.

Einnig er hægt að taka leigubíl frá Verona-flugvelli og tekur ferðin til dæmis um 23 mínútur að Gardaland. Verð er yfirleitt frá 35–45 evrum.

Verona er einnig frábær tengipunktur fyrir þá sem vilja ferðast áfram um Ítalíu eða til nágrannalanda.

Riva del Garda

Riva del Garda er fallegur bær við norðurenda Gardavatns með litríkum byggingum, miðaldaturnum og þröngum húsasundum. Við vatnsbakkann má finna fjölda veitingastaða og notalegra kaffihúsa, bæði við höfnina og í gamla bænum.

Hægt er að leigja báta til að sigla út á vatnið og einnig er löng strönd sem hentar vel til sólbaðs og sunds. Bærinn er vinsæll fyrir gönguferðir, bæði meðfram vatninu og upp í fjöllin í kring.

Nago-Torbole

Skammt frá Riva del Garda eru bæirnir Nago og Torbole sem eru sérstaklega vinsælir meðal útivistarfólks. Torbole stendur við vatnið og var áður lítið sjávarþorp á meðan Nago stendur ofar og býður upp á stórkostlegt útsýni yfir vatnið.

Svæðið er sérstaklega vinsælt meðal þeirra sem stunda brimbrettasiglingar, hjólreiðar og fjallgöngur.

Malcesine

Malcesine er einstaklega fallegur bær við norðausturenda Gardavatnsins. Scaligero-kastalinn setur sterkan svip á bæinn og fyrir ofan gnæfir fjallið Monte Baldo.

Hægt er að ganga eða taka kláf upp á Monte Baldo þar sem útsýnið yfir Gardavatn er stórkostlegt. Í bænum eru fjölmörg kaffihús, litlir veitingastaðir og skemmtilegar sérverslanir.

Bardolino

Bardolino er einn þekktasti bærinn við Gardavatn og er sérstaklega frægur fyrir vínframleiðslu sína í Veneto-héraði. Bærinn hefur sitt eigið vínmerki, Bardolino DOC, frá árinu 1968.

Gamli miðbærinn er fullur af sjarma með steinlögðum götum, fallegum byggingum og notalegu andrúmslofti við vatnið. Þar er einnig mikið úrval af kaffihúsum og veitingastöðum.

Sirmione

Sirmione er einn vinsælasti bærinn við Gardavatn og þykir gamli bærinn einstaklega fallegur. Bærinn stendur á litlum skaga sem teygir sig út í vatnið og þar má finna hið glæsilega kastalavirki sem er eitt þekktasta kennileiti svæðisins.

Yst á skaganum er umferð bíla og hjóla bönnuð sem gerir stemninguna sérstaklega notalega fyrir gangandi gesti.

Lazise

Lazise er heillandi bær með þröngum hellulögðum götum, litlum veitingastöðum, kaffihúsum og sérverslunum. Bærinn er vinsæll meðal ferðamanna vegna afslappaðrar stemningar og fallegs umhverfis við vatnið.

Garda

Bærinn Garda liggur skammt frá Bardolino og er einn minnsti en jafnframt sjarmerandi bærinn við vatnið. Þar má finna litríkan gamlan bæ, litla höfn og notalegt mannlíf við strandlengjuna.

Meðfram vatninu eru fjölmargir veitingastaðir, verslanir og kaffihús. Vikulega er haldinn markaður þar sem hægt er að smakka og kaupa staðbundnar vörur frá héraðinu.

Verona – borg rómantíkur og menningar

Verona er borg lista, menningar og rómantíkur og er ein af fallegustu borgum Norður-Ítalíu. Borgin á sér sögu allt aftur til tíma Rómverja og þar má meðal annars finna hið fræga hringleikahús Arena di Verona.

Árið 2000 var Verona skráð á heimsminjaskrá UNESCO vegna sögulegrar byggðar og byggingarlistar.

Í borginni eru falleg torg, kirkjur, listasöfn, gamlar brýr og líflegt kaffihúsalíf þar sem tilvalið er að njóta ítalskrar matar- og vínmenningar.

Shakespeare notaði Verona sem sögusvið í Rómeó og Júlíu og því heimsækja margir Hús Júlíu og aðra staði tengda sögunni.

Isola del Garda

Isola del Garda er stærsta eyjan á Gardavatni og eitt fallegasta kennileiti svæðisins. Á eyjunni stendur glæsilegur kastali með stórum hallargarði og er eyjan í eigu Cavazza-fjölskyldunnar.

Hægt er að fara í siglingar út í eyjuna og yfir sumartímann eru þar oft haldnir tónleikar og sérstakir viðburðir í einstöku umhverfi.